Idol se eks lewenslank tronk toe
2009-10-29 13:28
Chantelle Nicholas
Kaapstad – Cheslyn Williams, ekskêrel van die Idols-wenner Karin Kortjé is tot lewenslange tronkstraf gevonnis vir die gru-moord op Renate Kellerman (39), ‘n gastehuiseienaar.
Hy is ‘n verdere vyf jaar tronkstraf in die Bellville-streekhof opgelê op aanklag van diefstal en agt jaar vir poging tot verkragting.
Williams het saam met Kortjé en me. Jabu Mlotshwa, haar destydse bestuurder, in Kellerman se gastehuis in Durbanville gebly terwyl hulle op ’n promosietoer was.
Hy is in 2006 in hegtenis geneem en het skuld ontken op die moordklag. Williams wat geen berou getoon het vir die dade wat hy gedoen het nie, is glo ook deel van die 28's-bende.
Sy hofsaak is deur verskeie vertragingstruuks gekenmerk, en ook deur die feit dat hy al ‘n hele paar Regshulpraad prokureurs in die pad gesteek het, waaronder adv. Charles Simon, mnre. Siyaad Dollie, Schearlton Cloete en Henry Brundson.
Tydens een van sy verskynings is sy saak uitgestel omdat hy glo “’n innerlike wroeging” gehad het. Op ‘n ander geleentheid het hy versoek dat die saak na ‘n ander hof geskuif moet word.
Die saak het nou vir ongeveer drie jaar gesloer.
- Nuus24