Identiteit van ontvoerde man geheim gehou
2011-11-26 19:49
Johannesburg – Die identiteit van die Suid-Afrikaanse man wat in Timboektoe, Mali, ontvoer is, sal nie bekendgemaak word nie uit vrees dat dit tot sy nadeel kan strek.
Die departement van internasionale betrekkinge het Maandag bevestig dat 'n Suid-Afrikaner in Mali ontvoer is.
'n Suid-Afrikaanse span in die omgewing het die saak opgevolg, het Clayson Monyela, woordvoerder vir die departement, gesê.
Die familie van die 36-jarige man is egter versigtig om nie sy identiteit bekend te maak nie.
"Ons is aangesê om te probeer om sy naam uit die media te hou want dit kan die ontvoerders 'n kans gee om iets te doen," het die man se pa gesê.
Hy het gesê die ontvoerders het nog nie met die familie in verbinding getree om 'n losprys te eis nie.
"Ons het gehoor dat die families van die ander mans al gekontak is, maar daar was nog glad nie enige kontak met ons nie."
Hy het gesê sy seun wou terugkeer huis toe ná hy tyd oorsee deurgebring het.
"Hy was in die bankwese. Hierdie sou sy finale avontuur wees voor hy terugkom om hom by my en my onderneming aan te sluit."
Die nuusagentskap AP het vroeër Saterdag berig dat 'n groep gewapende mans 'n Duitser in die stad Timboektoe in Mali gedood en drie mans, waaronder 'n Suid-Afrikaner, 'n Sweed en 'n Nederlander, gyselaar geneem het.
– Volg Nuus24 op Twitter.
- SAPA