IVP-raadslid sterf aan hartaanval

2012-08-21 22:56

Johannesburg – Viloshnee Pillay, ‘n IVP-raadslid in KwaZulu-Natal, is dood nadat sy ‘n hartaanval by haar huis in Greytown gehad het, het die party Dinsdag gesê.

Pillay, wat die IVP se verteenwoordiger in die Umvoti plaaslike munisipaliteit was, is Maandagaand dood, het Blessed Gwala, ‘n LP van die party, gesê.

“Raadslid Pillay het die IVP en die mense van Greytown met groot onderskeiding gedien. Sy sal baie deur haar party en haar gemeenskap gemis word,” het hy gesê.

Die party het sy medelye met haar familie betuig.

Haar begrafnis sal Donderdag om 10:00 by die Greytown-gemeenskapsentrum gehou word.

– Volg Nuus24 op Twitter

 

- SAPA