'IMF-lening moes eerder armoede verlig'
2012-06-21 07:30
Johannesburg – Nhlanhla Nene, adjunkminister van finansies, sê hy sal binnekort samesprekings voer met die drieparty-alliansievennote om die regering se besluit te verduidelik om $2 miljard tot die Internasionale Monetêre Fonds (IMF) se krisis-fonds by te dra.
Dit volg nadat Cosatu voorgestel het dat die besluit herroep moet word.
Die vakbondfederasie sê die geld moet gebruik word om armoede te verlig en die land se ekonomie te herstruktureer, het RSG berig.
Die ANC het intussen die besluit verwelkom.
Die party sê Suid-Afrika het as deel van sowel die Verenigde Nasies as die G20, 'n plig om met die res van die wêreld saam te werk om 'n herhaling van die ekonomiese insinking van 2008 te voorkom, het die radiostasie berig.
Die ANC se jeugliga (ANCYL) het in sy reaksie gesê hy is geskok oor die regering se besluit.
Die jeugliga sê hy verwerp die stap in die sterkste moontlike taal, weens die werklikheid dat miljoene jongmense in Suid-Afrika werkloos is en gebuk gaan onder armoede en ekonomiese ongelykheid.
“Dit word in die sterkste terme verwerp weens die realiteit dat terwyl ons jeug-maand in Suid-Afrika vier, miljoene jong mense werkloos is en deur erge armoede en ekonomiese ongelykheid in die gesig gestaar word,” het die liga luidens Sapa in ‘n verklaring gesê.
Volg Nuus24 op Twitter
