Hy voel in die steek gelaat, sê Malema
2010-05-27 08:46
Leopold Scholtz, Die Burger
Den Haag - Die leier van die ANC-jeugliga, Julius Malema, bly weier om te erken dat hy iets verkeerds gedoen het.
In ’n onderhoud met die BBC, wat ook op die organisasie se webwerf verskyn, het Malema gesê hy voel “in die steek gelaat” deur diegene op wie hy staat gemaak het. Hy het die strafmaatreëls wat die ANC teen hom ingestel het as onbeduidend afgemaak.
Die onderhoud is gevoer deur die BBC se korrespondent in Suid-Afrika, Andrew Harding.
Malema het onder meer gesê hy het nog geen woedebeheerklasse bygewoon nie, een van die ANC se strafmaatreëls teen hom.
“Een van die dinge wat ek geleer het, is om nooit staat te maak op enige individu in die politiek nie.”
Gevra of hy verraai voel deur pres. Jacob Zuma, wat gesê het hy is “buite beheer”, het Malema sy lojaliteit beklemtoon en gesê Zuma “klap die sweep teen die jeug” as hy iets verkeerds sien.
In antwoord op die stelling dat hy aanstoot gegee het toe hy homself met oudpres. Nelson Mandela vergelyk het, het hy botweg gesê: “Jy weet niks van Nelson Mandela nie.”
Hy het toegegee dat hy moontlik kan ophou om die lied “Dubul’ iBhunu” te sing, maar dadelik bygevoeg dat die Suid-Afrikaanse ekonomie langs rasselyne verdeel bly.
“Ek veg vir die emansipasie van swartes en Afrikane in die besonder, polities, sosiaal en ekonomies. Daar is rasseverdelings in dié land en die ekonomie groei steeds, maar die gaping tussen dié wat het en dié wat nie het nie groei verder. Dit is op ras gebaseer.”
Malema het ook gesê die Mugabe-regime se hantering van die grondkwessie in Zimbabwe is “baie goed, behalwe vir die gewelddadige deel daarvan. In Suid-Afrika moet ons demokratiese middele gebruik om die grond te herverdeel. Ons het ’n meerderheid in die parlement wat ons die mag sal gee om grond met kompensasie te onteien.”
- Die Burger