Huweliksprobleme dalk motief vir Franschhoek-moord
2013-01-22 10:37
Johannesburg – Huweliksprobleme en 'n buite-egtelike verhouding was dalk die motief vir die moord op Chanel du Toit, wat twee jaar gelede op 'n wynlandgoed in Franschhoek vermoor is, berig Die Burger.
Só het die staat Maandag in ’n voorlopige opsomming van sy saak teen die slagoffer se man, Johan du Toit (29), in die streekhof aangevoer.
Chanel se lyk is die oggend van 7 Julie 2010 deur haar skoonma in haar huis op die Dieu Donné-wynlandgoed aangetref. Sy is verwurg.
Hulle was skaars ’n jaar getroud.
Johan du Toit het skuld ontken op ’n aanklag van moord, sowel as ’n alternatiewe aanklag van strafbare manslag.
Die staatsaanklaer, Chris Abrahams, het in die hof gesê die staat sal in die verhoor aanvoer dat ’n buite-egtelike verhouding in ’n rusie tussen die twee ontaard het en dat dit regstreeks tot Chanel se dood gelei het.
Die staat sal ook die uitslag van ’n lykskouing gebruik om te probeer bewys dat sy reeds dood was toe die beskuldigde die huis verlaat het, wat hom op die toneel plaas ten tyde van die moord.
William Booth, vir die verdediging, het gesê aangesien die hof nog geen bewyse gesien het nie, is dié opsomming irrelevant en ontken hy en sy kliënt alle aantygings.
– Volg Nuus24 op Twitter
- SAPA
