Humeure vlam op by sitting oor e-tolstelsel

2012-11-14 07:10

Johannesburg – Humeure het opgevlam by die eerste openbare sitting oor die e-tolstelsel, wat tot gevolg gehad het dat sommige deelnemers die saal in Kempton Park verlaat, berig RSG.

Die deelnemers sê hul menings word nie in ag geneem nie.

Amptenare van die departement van vervoer het dit duidelik gestel dat die eerste ronde sittings verband hou met tariewe en uitsluitings en nie die toekoms van die e-tolstelsel nie.

Sommige deelnemers het gesê die e-tolstelsel word op die publiek afgedwing en geëis dat 'n haalbare alternatief gevind moet word. Hulle het ook gesê die tariewe is onbekostigbaar.

Wayne Duvenhage, voorsitter van die Bondgenootskap teen Stedelike Tol, het gevra waarom die sittings in Kempton Park gehou is en nie in Soweto of aan die Wes-Rand nie.

Hy sê armes word geïgnoreer omdat slegs diegene naby die lughawe of Centurion of die noorde die sittings kan bywoon.
 
– RSG

– Volg Nuus24 op Twitter