Huldeblyke stroom in vir Oscar se vriendin
2013-02-14 10:23
Kaapstad – Huldeblyke het Donderdag ingestroom vir Reeva Steenkamp, die Paralimpiese atleet Oscar Pistorius se vriendin, nadat sy volgens berigte vroegoggend deur hom doodgeskiet is.
Pistorius het haar glo in die arm en in die kop geskiet toe hy haar vir ‘n inbreker misgis het. Die polisie, wat nie sy identiteit wou bevestig nie, het gesê 'n 26-jarige man is in hegtenis geneem in verband met die skietery.
“RIP, pragtige Reeva,” het een vriendin op Steenkamp se Facebook-blad geskryf. “Rus in vrede. Die lewe kan baie, baie onregverdig wees,” het nog ‘n inskrywing gelui.
Haar volgelinge op die sosiale netwerk Twitter en verskeie bekendes het ook met skok en hartseer gereageer.
Ryk Neethling se suster, Jean-Marié, het haar skok uitgespreek.
“My ergste vrees bevestig... dit was @reevasteenkamp... pragtige engel van ‘n dame en mede-@NimueSkinSA-ambassadeur... RIP, pragtig.”
Steenkamp was aktief op Twitter. Een van haar laaste twiets Woensdagmiddag het gelui: “Wat beplan jy vir jou geliefde more??? #raakopgewonde#Valentynsdag.”
Die sokkerspeler en model Ryan Botha het sy medelye betuig: “Ek is so hartseer om te hoor van Oscar Pistorius en Reeva Steenkamp. Hoe tragies. My gedagtes en gebede is by Oscar en beide se families.”
“Al my liefde aan @reevasteenkamp se familie en vriende. Daar is nie woorde nie,” het @EmmaSadleir geskryf.
“Dit kan nie waar wees nie. ... @reevasteenkamp is een van die mooiste en mees ongelooflike meisies wat ek ken #verpletter,” het @Maxine_g getwiet.
Die televisieaanbieder Jeannie D het ook haar skok op Twitter uitgespreek: “Ek het geen woorde nie. In absolute skok!” het sy as deel van 'n inskrywing gesê.
Pistorius sal na verwagting Donderdag in verband met die voorval in die hof verskyn.
– Volg Nuus24 op Twitter
