Huishulp vertel van nag van hel
2011-12-07 07:00
Bloemfontein – 'n Gesin van Bloemspruit het ’n nag van hel beleef toe ’n tienerdogter voor haar ma, boetie en sussie om die beurt deur vier rowers verkrag is.
Die aanvallers het die arm gesin ook van al hul min besittings beroof.
Dié vrou, wat as huishulp in Pellissier, Bloemfontein, werk, het Dinsdag van die aanval twee weke gelede vertel wat haar dogter van haar menswaardigheid en haar gesin van al hul aardse besittings gestroop het.
Melinda Bester (19), ’n tweedejaar-onderwysstudent aan Kovsies, het deurentyd haar ma se werknemer by hul huis in Pellissier ondersteun terwyl sy van die angsnag vertel het.
“Sy werk só hard. Jy voel jy moet iets doen, maar wát? Die skade is klaar gedoen. Daar is so baie veldtogte totdat dit met iemand na aan jou gebeur en jy besef hoe ernstig dit is.”
Die aanval kom te midde van die veldtog van 16 dae van aktivisme teen geweld teen vroue en kinders.
Hoewel dit ’n internasionale veldtog net vir vroue is, het die Suid-Afrikaanse regering ook kinders hierby betrek.
Die vrou vertel sy en haar drie kinders was op Vrydag 2 Desember omstreeks 04:00 aan die slaap toe die booswigte by hul plakkershut in die Khayelitsha-woongebied in Bloemspruit ingebreek het.
“Ek het wakker geword. Hulle het vir my gesê ek moet die geld uithaal. Hulle het die komberse gevat, al die kos.”
Haar kinders, ’n 13-jarige seun en dogters, onderskeidelik 9 en 16 jaar oud, het ook wakker geword.
Sy en die jonger kinders is met ’n vuurwapen gedreig en beveel om op die bed te bly sit.
Die 16-jarige dogter is toe om die beurt verkrag.
Dit is wanneer sy oor haar dogter praat dat die trane loop.
“Sy is baie klein. Daai mans was baie groot, ek huil as hulle my kind rape.”
Haar dogter is twee dae lank in die Nasionale Hospitaal opgeneem waar sy behandeling ontvang het.
Sy praat nie oor wat gebeur het nie.
Sy sê al hul klere en haar tienerdogter se selfoon is ook gesteel.
“Hulle vat die geld. Hulle rape. Dít is wat hulle hier doen.”
Kapt. Harry Nagel, provinsiale polisiewoordvoerder, sê ’n klag van huisbraak, roof en verkragting word ondersoek ná ’n voorval Vrydag 2 Desember tussen 04:00 en 05:30 by ’n huis in Bloemspruit. Hy sê die polisie was egter net bewus van een rower in dié voorval. Hy sê niemand is nog in verband met die voorval in hegtenis geneem nie.
Volg Nuus24 op Twitter
- Volksblad