Huishulp vasgebind, verkrag in Klerksdorp
2010-07-26 20:36
Johannesburg – ‘n 41-jarige huishulp is by haar werkgewer se huis in Klerksdorp aangeval en verkrag, het die polisie gesê.
Die voorval het plaasgevind toe die vrou buitentoe gegaan het om die wasmasjien te konnekteer toe ‘n gewapende man in ‘n balaklava haar konfronteer, het adjudant-offisier Sam Tselanyane gesê.
Die man het die vrou oorval, haar oor die kop geslaan en haar na een van die kinders se slaapkamers geneem.
Hy het haar met die kinders se kouse vasgebind en haar met ‘n broek geblinddoek voordat hy haar na bewering verkrag het.
Hy het daarna na die hoofslaapkamer gegaan om juwele en munte te steel.
Hy het gevlug toe hy die vrou se werkgewer by die motorhuis hoor inry.
Die man en twee ander mense het die vermeende verkragter by ‘n ander huis ingejaag.
Die polisie is ontbied en die eienaar van die huis het gesê dat die vermeende verkragter ‘n kamer in die tuin gehuur het en toegang tot die huis gehad het.
Die verdagte het homself aan die polisie oorhandig.
Die 26-jarige man is in hegtenis geneem en sal na verwagting van verkragting en huisrowery aangekla word.
Hy sal na verwagting Woensdag in die magistraatshof in Klerksdorp verskyn.
Volg Nuus24 op Twitter.
- SAPA