Huishulp, tuinier steel R500K by bejaardes
2009-12-11 12:13
Johannesburg - ‘n Huiswerker en haar man is Donderdag in hegtenis geneem nadat hulle goedere ter waarde van R500 000 by hul werkgewers gesteel het, het die polisie in Welkom gesê.
Puleng Motsoeneng, polisiewoordvoerder, het gesê juwele, kontant en ‘n kluis wat aan die bejaarde egpaar behoort, is in die verdagtes se huis in Thabong gevind.
“‘n Krugermunt wat aan die egpaar behoort het, was ook onder die goedere," het Motsoeneng gesê.
Motsoeneng het gesê die diefstal het Woensdag plaasgevind en insps. George Tlisane en Mbulelo Jaho het sonder ophou na die verdagtes gesoek.
Die huiswerker (37) en haar man (49), wat as tuinier by die bejaardes gewerk het, sal binnekort in die landdroshof in Welkom verskyn.
“Die egpaar kon hul trane nie keer toe hulle in kennis gestel is dat die gesteelde goedere teruggevind is nie,” het Motsoeneng gesê.
- Sapa