Huishulp kla oor onthulling van MIV-status
2011-10-24 12:04
Johannesburg – ‘n Huishulp het by die Suid-Afrikaanse Menseregtekommissie (MRK) gekla nadat hospitaalpersoneellede haar werkgewer vertel het sy is MIV-positief, het The Times berig.
“Jy is besig om dood te gaan en swanger... Ek weet... Die laboratorium het my vertel jy’s siek,” het haar werkgewer na bewering geskree toe sy weer by die werk opgedaag het.
Die huishulp het na haar werk teruggekeer nadat sy drie dae in die Steve Biko- akademiese hospitaal in Pretoria deurgebring het.
Die 41-jarige vrou is kwaad dat ‘n tegnikus by die laboratoriumdienste haar reg tot privaatheid glo geïgnoreer en haar MIV-status sonder toestemming aan haar werkgewer bekend gemaak het.
Volgens die vrou het haar werkgewer nou ‘n “aaklige houding” teenoor haar.
“Sy vra my nie meer of vir haar tee te maak nie; sy wil my nie naby haar kamer hê nie en het dit duidelik gemaak dat sy my sal afdank as ek haar siek maak...” het die vrou aan The Times gesê.
Sagie Pillay, uitvoerende hoof van die laboratoriumdienste, sê die tegnikus ontken dat die toetsresultate onthul is.
Pillay sê ‘n volledige ondersoek sal geloods word om die sondebok te identifiseer.
“Hierdie is ‘n oortreding van die Wet op Gelyke Indiensneming, wat ‘n werkgewer verhoed om teen ‘n werknemer op grond van MIV te diskrimineer,” het Mishack Magakwe, woordvoerder vir die Gautengse departement van gesondheid, gesê.
“Dit is totaal en al onaanvaarbaar dat sy anders behandel word as gevolg van haar status, wat die werkgewer in die eerste plek onwettiglik bekom het.”
Die huishulp se werkgewer het aan The Times gesê sy het die laboratorium gebel omdat sy bekommerd was oor haar werknemer.
Sy sê sy wou uitvind “hoe ek haar kan help aangesien sy altyd siek is. Sy kyk mooi na my en ek moet mooi na haar kyk.”
Volg Nuus24 op Twitter
- SAPA
