Huishulp beswyk aan brandwonde
2009-08-10 16:57
Johannesburg – ‘n Huishulp wat saam met haar man en twee kinders in Blairgowrie in Johannesburg aan die brand gesteek is, is dood, het polisie Maandag gesê.
“Sy is gister [Sondag] in die hospitaal dood. Ons het nog geen verdere vordering in die saak gemaak nie. Ons doen nog ondersoeke,” het senior superintendent Eugene Opperman gesê.
Die pa en die twee babas, beide ongeveer ‘n jaar oud, is nog in ‘n kritieke toestand by die Chris Hani Baragwanath hospitaal.
Die vier mense is Vrydag by die huis in Olympicstraat aan die brand gesteek.
Die polisie het vroeër gesê dat hulle ‘n liefdesdriehoek as die moontlike oorsaak van die aanval sien.
- Sapa