Huiseienaars in ryk buurte ‘sal moet betaal of trek’
2010-02-10 10:30
Marelize Barnard
Kaapstad - Eienaars van wooneiendom in armer gedeeltes van Kaapstad kan moontlik die volgende vier jaar minder eiendomsbelasting betaal vanweë die nuwe munisipale eiendomswaardasies.
Emil Weichardt, bestuurder van die Kaapstadse munisipaliteit se waardasiedepartement, het gister gesê die swakker eiendomsmark in dié segment kan wel beteken dat eiendomsbelasting in sommige gevalle gaan daal of dieselfde bly. Hy het inwoners daarop gewys dat elke eiendom afsonderlik gewaardeer is in die nuutste munisipale waardasies. “Ligging, grootte, verbeterings, die aantal slaapkamers en die gehalte van die afwerkings speel gesamentlik ’n rol in die waardasieproses.”
Die eiendomspryse wat in die onmiddellike omgewing van die betrokke eiendom behaal is, is ook in ag geneem. Waar daar in sogenaamde rykmanswoonbuurte hoër pryse behaal is vir eiendom sedert die vorige waardasie, sal waardes styg en inwoners meer erfbelasting betaal. Iemand wat al dekades lank in ’n strandkothuis in Clifton woon waarvan die waarde nou R16 miljoen of R18 miljoen is, kan nie afslag kry nie.
“Jy kan nie voortgaan om in ’n rykmansbuurt te bly as jy dit nie kan bekostig nie,” het Weichardt gesê.
In sulke gevalle sal die eienaars ’n plan moet maak, soos om ’n verband op hul eiendom uit te neem om die eiendomsbelasting te kan bekostig.
Die nuwe waardasies – wat geld van 1 Julie vanjaar tot 30 Junie 2014 – is van 22 Februarie af vir ’n tydperk van twee maande ter insae sodat eiendomsbesitters beswaar kan maak indien nodig. Die waardasies sal op die munisipale webblad, www.capetown.gov.za/propertyvaluations/, beskikbaar wees.
Mense met navrae het twee maande tyd om dit by 18 lokale wat reg oor Kaapstad ingerig is, te doen.
Daar is 780 000 eiendomme se inligting op die webblad beskikbaar en dit is dus nie nodig dat almal dié lokale hoef te besoek nie.
“Ons kan nie allerlei voorstelle oor die waardasies aanvaar nie. Daar is bepaalde riglyne gevolg met die waardasies. Jy kan nie jou buurman se eiendom as voorbeeld gebruik vir jou klagtes nie. Elke eiendom is uniek,” het Weichardt beklemtoon.
Hy het ook gevra dat diegene wat navrae het, dit deur die loop van die twee maande rig.
Almal moenie op die eerste dag al antwoorde verwag of andersins tot die laaste minuut wag om besware in te dien nie. Indien foute gemaak is, word dit reggestel.
- Die Burger