Huilende musikant 'wil sy lewe terughê'
2010-03-19 06:54
Daniëlla du Plooy, Die Burger
Johannesburg - Die musikant Jub Jub (Molemo Maarohanye) het Donderdag huilend in die Protea-landdroshof in Soweto gesê hy wil net sy “lewe terughê”.
Die hof het Woensdag gehoor Maarohanye en sy medebeskuldigde, Themba Tshabalala, is positief getoets vir kokaïen en morfien nadat hulle glo vier skoolseuns doodgery het.
Hulle word van moord aangekla. Maarohanye het Donderdag tydens ondervraging deur Liezl van Jaarsveld, aanklaer, ontken dat hy gedrink, dwelms gebruik of voor die ongeluk resies gejaag het.
Hy het gesê hy sal Tshabalala nie eens as ’n vriend beskryf nie.
“Hy is bloot ’n kennis. Hy het dié dag agter my aangery om na musiektoerusting te kyk.”
Volgens Maarohanye is Tshabalala eintlik bevriend met ene Thumelo, wat saam met Maarohanye in die motor was ten tyde van die ongeluk.
“Ek doen baie werk vir die jeug, so ek drink nie. Ek voel aaklig oor wat gebeur het en my hart gaan uit na die families, maar dit was net ’n ongeluk,” het hy gesê en kort-kort opgehou praat om trane af te vee.
“Enigiemand kan in ’n ongeluk betrokke wees, so ek verstaan nie waarom ék gekruisig word nie.”
Maarohanye het ook gesê hy wil op borgtog vrygelaat word om sy “kop skoon te kry” en tyd saam met die ma van sy ongebore kind deur te bring. Hy word eersdaags vir die eerste keer pa.
Hy en Tshabalala het albei aangedui hulle gaan skuld ontken.
Kapt. Moses Magapo, takhoof van die Protea Glen-polisiekantoor, het getuig skoolkinders het aan hom ’n petisie met honderde handtekeninge oorhandig waarin hulle borgtog teenstaan.
Daar was ook weer honderde betogende kinders buite die hof. Talle van hulle het plakkate met dreigemente rondgeswaai.
Die polisie het hulle met rubberkoeëls verjaag toe hulle oproerig geraak het.
Maarohanye en Tshabalala hoor vandag of hul aansoek om borgtog toegestaan word.
- Die Burger