Huilende Oscar se pa troos hom
2013-02-15 11:44
Pretoria – Die Paralimpiese ster Oscar Pistorius het Vrydag in die Pretoriase landdroshof in trane uitgebars, waar hy weens die moord op die model Reeva Steenkamp verskyn het.
Sy pa, Henke, het sy hand agter sy seun se rug gesit en hom getroos.
Die Paralimpiese ster, wat sy eerste hofverskyning gemaak het, staan tereg op 'n aanklag van moord nadat Steenkamp Donderdag in sy huis in die ooste van Pretoria doodgeskiet is.
Die staat wou vra dat die saak uitgestel word, maar adv. Gerrie Nel, die staatsaanklaer, het gesê hy is bewus dat die verdediging nie ten gunste daarvan sal wees nie.
Oscar het in 'n donker pak uit die aanhoudingselle in die hof gekom.
Sy suster, Aimee, en sy ouer broer, Carl, was ook in die hof.
Pistorius word verteenwoordig deur die vooraanstaande advokaat William Booth, wat al een van die berugste bendeleiers in Kaapstad, Rashied Staggie, verteenwoordig het.
Hooflanddros Desmond Nair het die saak aangehoor.
Twee polisievoertuie het Pistorius Vrydag na die Pretoriase landdroshof gebring en 'n mediastorm veroorsaak. 'n Man, wat vermoedelik Pistorius is, het op die agtersitplek van een van die voertuie gesit. Die kappie van 'n baadjie is oor sy kop getrek.
– Volg Nuus24 op Twitter
- SAPA
