Howe kan nie sê wie gaan Mangaung toe – ANC
2012-12-14 17:44
Mangaung – Die ANC het Vrydag gesê Suid-Afrikaanse howe kan nie bepaal wie sy nasionale verkiesingskongres in Mangaung bywoon nie, berig Eyewitness News.
Die grondwethof het vroeër vandag beslis dat die ANC se Vrystaatse provinsiale verkiesingskonferensie ongeldig is, het Sapa berig.
“Die provinsiale verkiesingskonferensie van die Vrystaatse provinsie van die African National Congress wat tussen 21 en 23 Junie 2012 gehou is, en sy besluite en resolusies is onwettig en ongeldig verklaar,” het adjunkhoofregter Dikgang Moseneke in die uitspraak gesê.
Ses lede van die ANC in dié provinsie het verlede maand by die hof aangeklop omdat hulle die provinsiale uitvoerende komitee se geldigheid bevraagteken het. Hulle het beweer die verkiesings was onregmatig.
Vrae is gevra oor afgevaardigdes van die Vrystaat en hoeveel van hulle deel gaan wees van die verrigtinge wat Sondag in Mangaung begin.
Gwede Mantashe, hoofsekretaris van die ANC, het gesê hulle sal die uitspraak as riglyn gebruik wanneer die party se prosesse in die toekoms bepaal word.
"Ek dink nie daar is 'n hof wat sal sê ons moet die konferensie van die ANC bywoon nie. Geen hof kan dit sê nie. Elke afgevaardigde, selfs al word die provinsiale konferensie van die ANC herhaal, sal deur die tak in algemene vergaderings benoem word."
Die ANC se verkiesingskonferensie begin Sondag by die Universiteit van die Vrystaat.
– Lees meer hier
– Volg Nuus24 op Twitter
