‘Hou politiek uit Lindley-plaasmoord'
2010-12-12 06:21
Die AWB en ander politieke organisasies is nie welkom in Lindley nie.
Dit
is sý dogter en familie wat vermoor is en hulle vind berusting op hul
eie manier, het Paul van Staden gister aan Rapport gesê.
Sy
dogter, Wilna Potgieter (36), haar man, Attie (40), en hul dogter,
Willemientjie (2), is verlede week op hul plaas in die Lindley-distrik
vermoor.
Die ma en dogter is in die kop geskiet en die moordenaars het met kontant en elektroniese toerusting gevlug.
Die sinloosheid van die moord op Willemientjie het veral die gemoedere laat opvlam en plaasmoorde weer in die kollig geplaas.
Dit was ’n reuse-skok vir Van Staden om te ervaar hoe ’n hele gesin in hul familie oornag uitgewis is.
Maar niks kon die familie voorberei op die tweede storm wat die wrede moorde landwyd ontketen het nie.
By
Maandag se hofverskyning van die vermeende moordenaars het
ondersteuners van die AWB, die VF+, AfriForum, Vrystaat-Landbou en die
ANC-vroueliga buite die hof betoog.
Sommiges het die terugkeer
van die doodstraf bepleit en die regering gekritiseer omdat hulle
hulself glo nie uitgespreek het teen die moorde nie.
Dr. Pieter Mulder, VF+-leier, het ook gesê hy meen die moorde was ras-gemotiveerd.
Toe mense Bok van Blerk se liedjie De la Rey voor die hof begin speel, het die familie van die slagoffers dit stopgesit.
Van Staden sê al dié mense spreek oordele uit, terwyl die familie glo net God kan oordeel.
“Haat help niks. Daar is net Een na wie ek opkyk. Ek het my berus by wat gebeur het.”
Voor
Donderdag se begrafnis het Van Staden ’n herhaling van die gebeure by
die hofverskyning probeer verhinder deur te vra dat daar nie politieke
aktiwiteite moet wees nie. “Ek het reguit vir die AWB gesê hulle is nie
welkom in Lindley nie.”
Hy is dankbaar dat die familie, vriende en kollegas van die Potgieters met waardigheid hul geliefdes begrawe het.
Met
sy vrou, Bokkie, gaan dit nog baie sleg. “Dis omdat sy die kleintjie
grootgemaak het. Sy was die meeste van die tyd hier by ons (terwyl haar
ma gewerk het).”
Die Lindley-gemeenskap is ’n hegte groep wat die misdade uit een mond veroordeel en saam rou.
“Jy sien in moeilike tye regtig wie is wie. Die gemeenskap bied wonderlike ondersteuning.”
Die
17-jarige seun wat van die moorde op die Potgieter-gesin aangekla word,
is te gevaarlik om saam met plaaslike jeugdiges aangehou te word.
Hy
is ’n vlugrisiko omdat hy die polisie glo probeer ontwyk het en kan
weens die wreedheid van sy beweerde misdade nie aan ander kinders
blootgestel word nie.
Hy word in die jeugafdeling van die
Kroonstad-gevangenis aangehou. Die hof het die afgelope week voorlopig
bevind hy kan nie in sy ma se toesig vrygelaat word nie.
Hy het
juis by sy ouerhuis vier uur lank onder ’n bakkie se seil weggekruip
voordat die polisie hom gevind het, het Rapport verneem.
’n
9mm-pistool met bloedspatsels is toe onder die enjinkap van die voertuig
gekry. Verskeie bloedbespatte bankkaarte en ’n kamera, wat later deur
die oorledenes se familie uitgeken is, is by hom gevind.
Sy ma
het ook sy klere aan die polisie gegee en dit was vol bloedspatsels, wat
bewys hy het moontlik self die doodskoot afgevuur.
’n Panga, ’n 9mm-pistool en ’n .357 Magnum-rewolwer is in die moorde gebruik.
Volgens
die 17-jarige se geboortesertifikaat, wat Rapport nagegaan het, verjaar
hy op 17 Februarie. Met sy hofverskyning het die landdros gelas dat hy
saam met die volwassenes beskuldig en verhoor word.
Drie van die
beskuldigdes, Stemmer Boy Mofokeng (22), Tapa Mo-pontola Mofokeng (23)
en Paulus Samson Vusimuzi Khumalo (22), het op die plaas Tweefontein
gewerk waar die moorde gepleeg is.
Nog twee mans, Tshololo Tello
Mischach Letala (18) en Telleko Sex Seekoei (19) staan saam met hulle
tereg op agt aanklagte wat wissel van moord en roof met verswarende
omstandighede tot die onwettige besit van wapens en ammunisie.
Stemmer Mofokeng het sélf ’n kind van 15 maande, ’n bietjie jonger as klein Willemien Potgieter (2).
Rapport
het sy ma, Maria Mofokeng, en sy vriendin, me. Liesbet Xaba, in die
township buite Lindley opgespoor. Hulle het hom by die hof en in die
tronk besoek waar hy ontken het dat hy by die moord- en rooftog betrokke
was.
“Hy sê hy weet niks. Hy was by die stoor toe hy glas hoor
breek. Ons hoor maar net die name van die ander mans. Ons ken hulle
nie,” het Xaba gesê.
Stemmer Mofokeng het sowat ’n jaar op die
plaas gewerk teen R1 200 per maand. Volgens Xaba het hy lekker gewerk en
goed oor die weg gekom met die vermoorde Attie Potgieter.
“Hy
het gesê die man hou baie van hom en dit maak die ander jaloers. Hy het
(’n paar maande gelede) gesê ander mense wil hom doodmaak omdat
(Potgieter) meer van hom hou as van die ander.”
Die beskuldigdes doen na verwagting môre aansoek om borgtog.
- Rapport