Hospitaalbestuur blameer vir babas se dood

2013-01-07 16:15

Johannesburg – Die National Education and Health Allied Workers’ Union (Nehawu) het Maandag die bestuur van die George Masebe-hospitaal in Limpopo blameer vir die dood van vier babas oor die naweek.

“Die babas is dood aan behandelbare siektes omdat daar nie genoeg dokters by die hospitaal was nie. Dit is nalatig van die hospitaal se bestuur en grens aan kriminaliteit,” het Nehawu by monde van Jacob Adams, 'n woordvoerder, gesê.

“Ons vra vir ‘n ondersoek oor die voorval, en vra dat die bestuur tot verantwoording geroep word.”

Vier babas is Vrydag by die hospitaal dood as gevolg van die onbeskikbaarheid van dokters om hulle te behandel.

“Daar was net drie dokters aan diens by die hospitaal,” het dr Mashilo Kgathi, wat aan diens was, aan die Daily Sun-koerant gesê.

Adams het bygevoeg dat dit onregverdig sal wees om die verpleegsters en die dokters te blameer vir omstandighede buite hulle beheer.

“Die bestuur moet die volle verantwoordelikheid dra. Hulle is deur ‘n krisis in die gesig gestaar toe drie van hulle nege dokters in Desember 2012 bedank het.”

– Volg Nuus24 op Twitter   
 

- SAPA