Hospitaal-skieter dalk bipolêr
2012-04-28 07:54
Kaapstad – Die man wat doodgeskiet is nadat hy 'n vrou vier uur lank by die Westville-hospitaal in Durban aangehou het, het moontlik aan bipolêre versteuring gely, het iol berig.
Die polisie het besluit om die man te skiet toe onderhandelings 'n dooie punt bereik het, het kol. Jay Naicker, woordvoerder vir die KwaZulu-Natalse polisie, gesê.
Hy het volgens aanvanklike berigte twee gyselaars gehad, maar die polisie het later die tweede vrou veilig in die hospitaal aangetref.
Die man het vroeër skote in die hospitaal afgevuur, en Leanne Nyiri, 'n woordvoerder vir die hospitaal, sê hy het in 'n stadium ook 'n ontvangsdame gyselaar geneem.
Sy is na die eerste vloer van die gebou geneem maar het daarin geslaag om te ontsnap.
Die skieter, Bongani Shange (39), se pa, Sunny Shange, het aan Beeld gesê: “My seun was siek. Hy was siek in sy brein. Hy het baie keer hiernatoe gekom om gesond te word en vandag is hy hier dood.”
– Lees hier meer.
– Volg Nuus24 op Twitter.
- SAPA
