Rob Ferreira-hospitaal sit sonder krag
2011-03-25 07:55
Nelspruit – Dit kan tot vier weke duur voordat die kragtoevoer na die Rob Ferreira-hospitaal hier volkome herstel is.
Die hospitaal is sedert Woensdag sonder krag nadat ’n brand in sy substasie uitgebreek het.
Die kragnetwerke van verskeie sale is Donderdag aan kragopwekkers gekoppel sodat die sowat 250 pasiënte wat steeds in die hospitaal is nie nog ’n nag in die donker deurbring nie.
John Mlangeni, woordvoerder van Mpumalanga se departement van gesondheid, het gesê ingenieurs is intussen volstoom besig om die oorsaak van die brand te ondersoek.
Intussen het die polisie ook ’n klag van brandstigting begin ondersoek, het lt.kol. Leonard Hla-thi, polisiewoordvoerder, gesê.
Twee pasiënte wat ten tyde van die brand in die waakeenheid behandel is, asook ses babas in broeikaste is reeds kort ná die kragonderbreking na ander hospitale, waaronder die Nelspruit Medi-Clinic, oorgeplaas.
Die aanvanklike vermoede was dat die brand deur ’n kortsluiting veroorsaak is.
Forensiese deskundiges van die polisie het Donderdag begin om die substasie vir leidrade te fynkam. Beeld het betroubaar verneem die moontlikheid van sabotasie word nie uitgesluit nie.
Die brand het Woensdag omstreeks 13:00 ontstaan. Daar is aanvanklik vermoed twee van die drie transformators in die substasie is in die brand verwoes. Dit het egter later aan die lig gekom dat die transformators net geringe skade opgedoen het.
Brandskade aan die reuse-sekeringskaste, stroombrekers en kragkabels beloop na raming R2 miljoen.
Die twee dieselaangedrewe noodkragopwekkers van die hospitaal is nie in die brand beskadig nie. Die kragopwekkers is in ’n gebou langs die substasie.
Hulle kan egter nie gebruik word nie omdat die sekeringskaste en hooftoevoerkabels waardeur hulle krag aan die hospitaal moet voorsien, dié is wat verwoes is.
Mlangeni het gesê die hospitaal se waakeenheid, kraamsaal, buitepasiënte- en ongevalle-afdeling, kombuis en lykhuis is gesluit.
Die hospitaal se kombuispersoneel en onafhanklike spyseniers maak kos in tydelike kombuise.