BeeldPretoria - Hulp stroom in vir baba Hope, die pasgebore meisietjie wat Sondagoggend in plastiek toegedraai in ’n stuk veld naby ’n begraafplaas in Centurion gevind is.
Talle Beeld-lesers het Maandag gebel en e-pos gestuur om te vra hoe hulle baba Hope kan help. Van die lesers het ook aangebied om haar aan te neem.
Intussen is baba Hope steeds veilig in ’n broeikas by die Steve Biko-hospitaal in Pretoria waar sy versorg word sedert paramedici van die LifeMed-ambulansdienste haar gered het.
Frikkie Gous, woordvoerder van LifeMed, het gesê personeellede by die hospitaal het die baba Hope gedoop omdat sy wonderbaarlik oorleef het.
Munisipale werkers het haar ontdek. Toe paramedici daar aankom was sy yskoud en erg ontwater.
Gous het vroeër gesê as sy ’n uur langer in die warm son gelê het, sou sy gesterf het.
Fredah Kobo, hospitaalwoordvoerder, het gesê die baba mag dalk later vandeesweek ontslaan word.
Sy het gesê sy sal môre bekend maak waarheen mense goed vir Hope kan stuur sodra die hospitaal dit bespreek het met die maatskaplike werker wat die baba se saak hanteer.