Hoofgetuie, advokaat in bekgeveg in Kebble-saak
2010-07-31 10:07
Johannesburg - “Ek is nie ’n leuenaar nie, jou beskuldigde is ’n leuenaar!” het Clinton Nassif, die staat se hoofgetuie in die Kebble-moordverhoor, gister aan Glenn Agliotti se regsverteenwoordiger geskree.
Adv. Laurance Hodes SC het net vantevore hard en herhaaldelik aan Nassif gesê hy lieg. Dit het in ’n oor-en-weer-bekgeveg ontaard waarin albei gelyk ewe hard gepraat het.
Regter Frans Kgomo het ingegryp.
“Mnr. Nassif, moenie so emosioneel raak nie, selfs nie as jy nie hou van wat gesê word nie. As jy so emosioneel is, kan jy baie maklik iets sê waaroor jy later spyt gaan wees.”
Nassif is een van die vier beplanners van die moord op die mynmagnaat Brett Kebble en die aanval op Stephen Mildenhall, ’n ouditeur van Allan Gray, wat drie keer gewond is.
Nassif en die drie mans wat die skietwerk gedoen het, het almal ooreenkomste met die staat aangegaan ingevolge art. 204 van die Strafproseswet dat hulle gevrywaar sal word van vervolging as hulle die eerlike en volle waarheid praat.
Hodes het dit herhaaldelik aan Nassif gestel dat hy nie sy vrywaring gaan kry nie omdat hy lieg.
Hodes het uitgewys dat Nassif in sy “204-verklaring”, waarin hy onderneem het om die volle waarheid te gee, Agliotti nêrens genoem het as deel van die plan om Mildenhall te skiet nie.
Dié verklaring is op 8 November 2006 afgelê. Nassif betrek Agliotti vir die eerste keer in ’n “aanvullende verklaring” wat eers vanjaar op 30 Maart sonder art. 204-beskerming afgelê.
Volgens Hodes is dit omdat Nassif “gemotiveer” is om Agliotti te betrek. “Hierdie is woorde wat in jou mond geplaas is,” het Hodes gesê. Nassif het dit ontken.
In die tweede verklaring sê Nassif Agliotti het hom gelukgewens met die taak wat hy uitgevoer het (om Mildenhall te laat skiet).
Agliotti het hom voor die tyd R200 000 gegee van die R1 miljoen waarop hulle ooreengekom het.
Aanvanklik het Nassif getuig hy het R200 000 kontant van Agliotti gekry en dit aan mnr. Mikey Schultz gegee om Mildenhall vir twee tot drie maande “uit sirkulasie” te kry. Daarna het hy getuig hy “kan nie onthou” of dit ’n tjek was wat hy laat wissel het of kontant nie. Daarna het hy egter getuig dit was ’n tjek van sy eie maatskappy.
Hodes: “Besef jy dat jy nou drie verskillende antwoorde op dieselfde vraag gegee het binne een minuut? Besef jy watter gek maak jy van jouself in hierdie hof?”
Nassif het gister die naam van ’n senior joernalis, Paul Kirk van die Citizen, gevoeg by die wenslysie van mense wat Kebble en sy vennoot mnr. John Stratton wou laat doodskiet.
Vroeër is ook verwys na die “redakteur van Noseweek”, wat vermoedelik verwys het na Martin Welz. Ander mense op die lysie was Mark Bristow, hoofbestuurder van Randgold Resources, Mark Wellesley-Woods, ’n direkteur van Durban Roodepoort Deep, en Daniel Jean Nortier, finansiële hoof van Aflease Limited.
- Volg Nuus24 op Twitter
- Die Burger