Hoof beboet ná slae met kolf
2010-10-21 08:02
Johannesburg - Die ouers van ’n leerling van die Laerskool Burgersfort in Mpumalanga meen ’n skulderkenningsboete van R1 000 is ’n heeltemal te ligte straf vir die skoolhoof wat hul seun met ’n krieketkolf geslaan het.
Die ma van die seun, wat ingevolge wetgewing nie geïdentifiseer mag word nie omdat hy minderjarig is, het aan Beeld gesê sy weier om die saak daar te laat.
Coert Erasmus, hoof, het die seun glo ’n paar weke gelede met ’n krieketkolf oor die boude geslaan.
Die ma is ná die voorval skool toe waar sy Erasmus gekonfronteer en hom gewaarsku het “om nie aan my kinders te vat nie”.
Volgens die ma het sy die polisie gebel, maar toe hulle twee dae later nog nie by haar huis was nie, het sy ’n klag by die polisiekantoor gaan indien.
Die ma het Woensdag gesê die ondersoekbeampte in die saak het haar tydens die ondersoek twee keer gevra of sy die saak nie wil terugtrek nie.
Sy het geweier en die uiteinde was dat Erasmus ’n skulderkenningsboete van R1 000 betaal het.
“Ek dink dit is belaglik. ’n Boete verander niks aan die vernedering en pyn waardeur hy my kind gesit het nie.”
Erasmus het erken hy het die boete betaal en gesê die departement is oor die voorval ingelig.
Die ma het die saak Dinsdag ook by Kinderlyn se kantoor in Polokwane aangemeld waarheen die inbelsentrum haar deurgeskakel het.
Sy het ook per MMS foto’s van haar kind se rooi boude na Rose Thulele in dié kantoor gestuur.
Thulele was nie Woensdag op kantoor nie, maar ’n woordvoerder het bevestig hulle weet van die voorval en dit sal ondersoek word.
Dr. James Lidderd, voorsitter van die skool se beheerliggaam, het gesê hulle het die ouers gaan spreek en aangebied om ’n interne verhoor te hou.
“Hulle het uit hul eie ’n klag by die polisie ingedien.”
Volgens Lidderd het hy die onderwysdepartement se kringbestuurder gebel om te hoor wat hulle te doen staan.
“Hy was ten tyde van die voorval nie by sy kantoor nie en het gesê totdat daar nie ’n amptelike klag is nie, is daar nie ’n saak nie.”
Lidderd het gesê hy het nog nooit klagte van ander ouers gekry dat hul kinders aangerand word nie.
“Die voorval is jammer en (mnr.) Erasmus is daaroor aangespreek. Hy is steeds ’n goeie hoof wat baie goeie werk vir die skool doen,” het Lidderd gesê.
- Beeld