Honderde vas oor verkeersboetes
2009-10-02 08:16
Johannesburg – ‘n Vragmotorbestuurder wat meer as R11 000 in verkeersboetes geskuld het, is by ‘n padblokkade in Rustenburg in hegtenis geneem, het Noordwes se departement van openbare veiligheid Vrydag gesê.
Die 49-jarige man, wat 19 lasbriewe vir sy inhegtenisname gehad het vir boetes wat nie betaal is nie, is Woensdag in hegtenis geneem, het woordvoerder Lesiba Kgwele gesê.
Hy het later die R11 120 betaal wat hy geskuld het.
“Verkeersamptenare het 571 motoriste in hegtenis geneem en oor die R265 000 gekry van onbetaalde verkeersboetes vandat die spesiale veldtog 10 dae gelede afgeskop het,” het Kgwele gesê.
In totaal is 350 lasbriewe vir inhegtenisname rondom Mafikeng, Lichtenburg en Zeerust uitgereik en die veldtog duur nog voort, het hy gesê.
- Sapa