Honderde poste weg weens geldtekort
2010-08-05 09:37
Die Burger
Kaapstad - Altesaam 300 onderwysposte in die Wes-Kaap gaan aanstaande jaar afgeskaf word.
“Die departement het ’n tekort van R197 miljoen gehad,” het Paul Boughey, hoof van die Wes-Kaapse ministerie van onderwys, gesê. Ná besparings is daar steeds ’n tekort van R97miljoen.
“Ons het geen ander keuse as om poste te verminder nie.”
Dié feite het Woensdag op ’n konsultasie-vergadering met vakbonde om die beplanning vir 2011 te finaliseer, aan die lig gekom.
“Die harde werklikheid is dat daar net nie geld is nie.”
Dié poste sal grootliks verminder word deur vakante poste, waarvan daar 945 in die Wes-Kaap is, nie te vul nie. Onderwysers wat in distrikskantore werk, se poste sal egter in die gedrang kom.
Die afgelope vyf jaar is jaarliks bykomende poste geskep. Daar is tans 32246 onderwysers in diens van die WKOD.
Die geldtekort het die afgelope vier jaar opgebou en spruit hoofsaaklik uit die resessie, verhoogde salarisse van onderwysers en beroepspesifieke vergoeding (OSD-betalings).
“Ons gaan alles in ons vermoë doen om te verseker geen onderwyser wat daagliks voor ’n klas staan, word verwyder nie.”
Die onderwyser-kind-verhouding per klas sal steeds 34:1 bly.
Volgens Boughey is personeel hul grootste uitgawe, dan volg infrastruktuur en handboeke.
“Dit help nie ons het onderwysers, maar geen geboue waarin onderrig kan plaasvind of geen materiaal waarmee dit gedoen kan word nie.”
Bongani kaMcoyana, Wes-Kaapse voorsitter van die Suid-Afrikaanse Demokratiese Onderwysersunie (Sadou), het gesê die WKOD is heel duidelik nie ernstig oor onderrig in arm skole nie.
“Ons gaan dit beslis nie aanvaar nie.”
Pieter Coetzee, Wes-Kaapse sekretaris van die SAOU, het gesê die stelsel maak nie voorsiening daarvoor dat mense sommer net afgedank kan word nie.
- Die Burger