Honderde onwettige mynwerkers vas
2010-12-07 21:34
Johannesburg – Honderde onwettige mynwerkers is by die Aurora Grootvlei-myn in Springs in hegtenis geneem, het die Gautengse polisie Dinsdag gesê.
“Ons het sover meer as 200 onwettige mynwerkers in hegtenis geneem, maar die inhegtenisnemings gaan voort. Ons is steeds besig om die verdagtes te tel,” het kapt. Johannes Ramphora gesê.
Ramphora het aan Sapa vertel dat die inhegtenisnemings Maandagmiddag begin het nadat wagte die onwettige mynwerkers ontdek het.
Volgens Ramphora is die presiese hoeveelheid nie bekend nie aangesien talle mynwerkers nog ondergronds is.
Die voormalige Big Brother-ster, Brad Wood, en vier ander verdagtes het verlede week in die Benoni-landdroshof verskyn op aanklag van moord nadat vier onwettige mynwerkers vroeër vanjaar doodgeskiet is.
Die myn se bestuur was nie onmiddellik vir kommentaar beskikbaar nie.
Die myn word besit deur Zondwa Mandela, oud-president Nelson Mandela se kleinseun, en pres. Jacob Zuma se neef Khulubuse Zuma.
Volg Nuus24 op Twitter.
- SAPA