Honderde in Kaapstad dakloos ná brande
2011-11-12 11:30
Kaapstad – Honderde inwoners is Saterdagoggend ná verskeie brande in Kaapstad dakloos gelaat, het die stad Kaapstad se rampbestuur-afdeling gesê.
"Die brande is vinnig in bedwang gebring en die impak is verminder danksy die vinnige optrede van die stad se brand- en reddingsdienste," het Wilfred Solomons-Johannes, ’n woordvoerder van die stad Kaapstad se rampbestuur-afdeling, gesê.
Kort voor 01:00 is 22 mense dakloos gelaat ná 'n brand in Wesbank wat drie formele huise en sewe agterplaaswonings verwoes het.
Solomons-Johannes het gesê 80 plakkershutte is in die Joe Slovo informele nedersetting deur 'n brand verwoes. Geen beserings is aangemeld nie, maar 320 mense is dakloos gelaat.
'n Brand het kort voor 05:00 by die dameskoshuis by die Kaapse Skiereilandse Universiteit van Tegnologie (KSUT) in Mowbray uitgebreek.
Die studente is uit die gebou ontruim, maar vyf vroue en twee mans is vir rookinaseming behandel.
Die polisie ondersoek een van die studente se bewerings dat sy haar kamer aan die brand gesteek nadat sy medikasie geneem het.
Solomons-Johannes het gesê humanitêre hulp is aan die mense verskaf.
"Hou asseblief 'n wakende oog op oopvlam-vure, gasstofies, kerse, lampe en paraffienstofies om te verhoed dat brande buite beheer raak."
– Volg Nuus24 op Twitter
- SAPA