Honderde Krugerpark-werkers gaan staak
2012-02-02 13:55
Johannesburg – Meer as 300 werkers by die Kruger Nasionale Park gaan staak, het die park Donderdag gesê.
“Hulle het vir ons kennis gegee dat hulle môre (Vrydag) gaan begin staak oor wat hulle “ongelykheid van salarisse” noem,” het woordvoerder William Mabasa gesê.
Die kennisgewing is uitgereik deur die Kommissie vir Versoening, Bemiddeling en Arbitrasie (CCMA) en bevestig dat 361 mense nie sal werk nie.
'n Totaal van 248 van dié getal is wildbewaarders, wat kommer wek oor die beskerming van die diere, veral renosters.
Uit die sowat 2 500 werknemers van die park is ongeveer 400 wildbewaarders.
Volgens Mabasa dink sommige werkers dat ander meer geld as hulle verdien.
In ‘n vorige gesprek het die bestuur verduidelik dat salarisverskille kan voorkom as gevolg van faktore soos ervaring of langtermyn indiensneming.
Alhoewel die werkers lede van ‘n vakbond is, staak hulle in hul eie hoedanigheid en dit is nog nie duidelik of hulle hul lidmaatskap by die vakbond gekanselleer het nie.
Die park het gebeurlikheidsplanne in plek en hulle sal van die Suid-Afrikaanse Nasionale Weermag, die polisie en vrywillige wildbewaarders gebruik maak.
Mabasa het bygevoeg dat besoekers kan voortgaan met hul planne om die park te besoek.
– Volg Nuus24 op Twitter
- SAPA