Hond leef nadat skurk mes in haar kop druk
2011-08-08 09:07
Stellenbosch – “Kom kyk gou, jou hond hardloop in die straat rond met ’n mes in haar kop.”
Met dié boodskap is die Stellenbosse skilder en musikant Vernon Swart Saterdag omstreeks 08:00 deur ’n buurman wakker gebel.
Dit blyk toe Swart se sesjarige kruising van ’n Duitse herdershond en ’n terrier, Bella, het ’n rooftog gefnuik waartydens ’n booswig haar met ’n dolk in die kop gesteek het.
Swart, bekend om sy naakstudies en landskappe en as Valiant Swart se tromspeler, het aanvanklik gedink die oproep is ’n grap.
“Dis mos absurd,” het hy Sondag gesê terwyl Bella rustig voor die kaggel in hul huis in Dennesigstraat, Stellenbosch, gelê het.
Ná die oproep het hy buitentoe gegaan, waar die “polisie aangecharge gekom het”.
“Toe bevlieg Bella húlle,” het Swart vertel.
Die buurman het die polisie intussen ontbied aangesien daar ook in dié se erf indringers was.
Die voornemende rower(s) het nooit die Swart-woning binnegedring nie, maar moes in hul erf gewees het.
Swart en sy vrou, Ingrid, wat tydens die voorval by die werk was, maar intussen huis toe gekom het, het Bella na ’n veearts geneem.
Sy is onder narkose geplaas en die veearts moes sy knie teen haar kop druk om die dolk uit te trek, het Swart gesê.
Afgesien van die steke wat Bella moes kry om die wond te heg, is sy tot hul verbasing blykbaar piekfyn.
Die dolk was sowat 12 cm diep tussen haar oë ingedruk, maar het haar brein blykbaar nie binnegedring nie.
Swart het gesê hy het die dolk aan die speurder oorhandig en die polisie sal hopelik vingerafdrukke daarop kan neem.
Maj. René Matthee, Stellenbosch se polisiewoordvoerder, het gesê hulle ondersoek ’n saak van opsetlike saakbeskadiging.
Om Bella vir haar dapperheid te beloon, het Ingrid Saterdagaand vir haar ’n stuk filet gaargemaak.
“Sy was nog onder narkose en het nog so half dronk geëet,” het sy vertel.
Volg Nuus24 op Twitter.
- Die Burger