Hofstukke op Zim-regering beteken
2010-01-22 20:55
Johannesburg - AfriForum se prokureurs in Harare, Zimbabwe, het vandeesweek hofstukke van die aansoek van drie Zimbabwiese boere teen die Zimbabwiese regering beteken.
Kragtens 'n bevel van die Pretoriase hooggeregshof verlede week, is die drie boere, Louis Fick, Michael Campbell en Richard Etheredge verlof gegee om die Zimbabwiese regering te voeg in 'n hofaansoek om 'n vroeëre bevinding van die SAOG-tribunaal teen pres. Robert Mugabe se grondgrypprogram in Suid-Afrika te laat registreer.
AfriForum se prokureur, Willie Spies het in 'n verklaring gesê die Zimbabwiese regering het nou tyd tot Dinsdag 26 Januarie 2010 om kennis te gee van sy voorneme (indien enige) om die aansoek te opponeer.
Die aansoek is op die hofrol geplaas om in die week van 23 Februarie 2010 aangehoor te word.
Indien die boere suksesvol is, sal hulle op die kort termyn stappe kan neem om in Suid-Afrikaanse howe 'n deel van hulle kostes tot op datum van die Zimbabwiese regering te verhaal.
- AfriForum