Hofstryd kom oor Boereoorlog-begraafplaas

2012-08-12 12:45

Kaapstad – AfriForum sal die Masilonyana-munisipaliteit in die Vrystaat die stryd in die hof aansê omdat die munisipaliteit glo nie 'n konsentrasiekampbegraafplaas in Winburg na behore bewaar nie. 

"AfriForum het in Julie 2012 'n aansoek teen die munisipaliteit gebring weens laasgenoemde se swak bestuur van die omgewing om hierdie belangrike erfenisterrein. Die munisipaliteit het pas aangedui dat dit die aansoek gaan opponeer," het 'n verklaring deur dié burgerregtegroep Sondag gelui.

Volgens AfriForum het die gebrek aan 'n rommelbeheerbeleid tot gevolg dat rommel om en op die terrein gestort word.

Die begraafplaas is die finale rusplek van vroue- en kinderslagoffers van die Anglo-Boereoorlog, asook enkele Britte.

Bourommel, huisafval en selfs dooie diere lê volgens AfriForum gereel op die toneel, en die pad na die terrein is haas onbegaanbaar. Boonop skep onwettige gruisgrawery direk langs die terrein 'n ernstige erosiegevaar. 

"Die munisipaliteit het voor AfriForum se aansoek verskeie versoeke van die Erfenisstigting en selfs direktiewe van die Vrystaatse Departement van Ekonomiese Ontwikkeling, Toerisme en Omgewingsake geïgnoreer en al [die] bogenoemde probleme toegelaat om te vererger," het die verklaring gelui.

– Volg Nuus24 op Twitter.

- Nuus24