Hof stampvol voor Oscar se verskyning

2013-02-15 09:34

Lede van die media drom in die Pretoria-landdroshof saam, waar Oscar Pistorius op ’n aanklag van moord sal verskyn. (@JacqueSteenkamp , Twitter)

Pretoria – Die Paralimpiese atleet Oscar Pistorius het Vrydagoggend kort voor 09:00 te midde van 'n mediastormloop by die Pretoriase landdroshof opgedaag.

Pistorius sal Vrydag formeel aangekla word van moord.

Met 'n baadjie oor sy kop en 'n polisieman wat sy gesig met 'n boek bedek, het fotograwe en televisiekameras hom afgeneem toe hy in die gebou geneem is.

Die hofsitting sal na verwagting om 10:00 begin. Hy sal om borgtog aansoek doen. Die staat het Donderdag gesê hy sal borgtog teenstaan.

Hof C, waar die ster-atleet sal verskyn, is stampvol.

Reeva Steenkamp, 'n model en regstudent van Port Elizabeth, is Donderdagoggend in Pistorius se huis in die Silver Woods-landgoed doodgeskiet.

Pistorius het Donderdagnag in polisie-aanhouding deurgebring.
      
– Volg Nuus24 op Twitter

- SAPA