Hof sê of e-tolstelsel voortgaan

2012-09-20 07:15

Johannesburg – Gautengse motoriste sal Donderdag hoor of die e-tolstelsel voortgaan wanneer die konstitusionele hof uitspraak lewer oor die tussentydse interdik wat die e-tolprojek tot stilstand gedwing het.

Regter Bill Prinsloo het op 28 April in die hooggeregshof in Pretoria die Opposition to Urban Tolling Alliance (Outa) se aansoek om ’n dringende interdik teen die implementering van die e-tolstelsel toegestaan.

Die Suid-Afrikaanse Nasionale Padagentskap (Sanral) en die nasionale tesourie het dié interdik teengestaan.

Sanral het aangevoer dat die vertraging van die projek hom verhoed om sy skuld, wat tydens die konstruksie aangegaan is, af te betaal.

Jeremy Gauntlett, prokureur van die nasionale tesourie, het gesê Prinsloo het nie genoegsame redes vir sy besluit om die interdik toe te staan, verskaf nie.

Outa se prokureur, Alistair Franklin, het aangevoer dat Sanral se keuse van die e-tolstelsel as 'n metode van befondsing meer skade as die interdik aanrig.

– Volg Nuus24 op Twitter