Hof sê 6 000 onnies moet heraangestel word
2011-02-23 11:28
Oos-Kaap – Meer as 6 000 afgedankte tydelike onderwysers in die Oos-Kaap is heraangestel nadat die Bhisho-hooggeregshof 'n tydelike bevel in hul guns toegestaan het, berig Herald Online.
Regter Jannie Eksteen het beslis dat die provinsiale departement van onderwys binne vyf dae alle tydelike poste moet vul.
'n Tydelike bevel is toegestaan tot Eksteen 'n finale besluit kan maak.
Die tydelike onderwysers is in Desember afgedank omdat die departement hulle nie kon bekostig nie.
Die tekort aan onderwysers het chaos in baie skole veroorsaak, met sommige leerders wat sedert die begin van die jaar nog geen lesse gehad het nie.
Die Federasie van Beheerliggame van Suid-Afrikaanse Skole (Fedsas), die Suid-Afrikaanse Onderwysersunie (SAOU) en die Westering hoër- en laerskole het die departement aangevat in 'n poging om die onderwysers terug in hul poste te kry.
Dinsdag se beslissing is die tweede van die jaar teen dié provinsiale departement. Twee weke gelede het die hof in die guns van verteenwoordigers van sogenaamde modderskole beslis. Hulle het R8,2 miljard gekry om modderskole in Suid-Afrika uit te wis.
Volg Nuus24 op Twitter
- SAPA