Hof nie oortuig van Selebi se siekte
2011-12-05 12:01
Pretoria – Jackie Selebi se regspan kon nie Maandagoggend daarin slaag om die griffier van die Johannesburgse hooggeregshof te oortuig dat hy te siek is om tronk toe te gaan nie.
Die hof het 'n ondersoekbeampte met 'n lasbrief na die Jakaranda-hospitaal, waar Selebi aansterk nadat hy Vrydag ineengestort het, gestuur.
Die veroordeelde voormalige nasionale polisiehoof, wat op borgtog van R20 000 uit is, moes Sondagoggend 10:00 by die Johannesburg-gevangenis aanmeld om sy 15 jaar vonnis vir korrupsie te begin, maar het versuim om dit te doen.
Selebi se prokureurs, Wynanda en Fanus Coetzee, kon nie daarin slaag om Viven Pather, griffier van die Johannesburgse hooggeregshof, te oortuig om Selebi se borgtog aan te pas of te verleng nie.
"Ons sal normale prosedure volg, wat sal beteken 'n ondersoekbeampte sal na die hospitaal gestuur word om vas te stel wat Selebi se toestand is."
Die griffier sal gebaseer op die bevindinge van die ondersoekbeampte 'n beslissing maak.
Pather het gesê indien die ondersoekbeampte bevind dat Selebi nie te siek is om tronk toe te gaan nie, sal hy uit die Jakaranda-hospitaal verwyder word en in 'n korrektiewe mediese fasiliteit geplaas word.
Selebi se regspan het 'n mediese sertifikaat by die hof ingedien, maar het geweier om die aard van sy siekte te bespreek.
– Lees meer hier
– Volg Nuus24 op Twitter