Hof hoor van R15 000 vir meisie se vet
2011-12-06 08:01
Bloemfontein – ’n Tradisionele dokter van Bloemfontein sou R15 000 vir die vet van ’n meisie betaal, het die Vrystaatse hooggeregshof gister gehoor in die verhoor van ’n man wat aangekla word dat hy ’n 12-jarige meisie vermoor het.
Net haar kopbeen, rugstring en enkele bene is later in ’n gruisgroef naby Brandfort gekry.
Luckyboy Segopolo (32) van die Majwemasweu-woonbuurt by Brandfort het voor waarnemende regter S. Naidoo ontken dat hy tussen 30 April en 2 Mei vanjaar vir Ida Ngomba (12) vermoor het.
Kapt. Paseka Mojaki van Bloemfontein het Maandag getuig dit is die vyfde moetie-moord wat hy ondersoek, maar die eerste een waar die slagoffer verbrand is.
Segopolo het vrywillig in die polisiekantoor op Brandfort vir hom vertel hy het die meisie verwurg.
Hy het vertel hoe hy en ’n makker, Tsediso, haar na ’n stadion gevat het om haar borste en binnevet af te sny en haar lyk te verbrand.
Hulle het haar in ’n staalbad gesit en vuur gemaak.
Dit het só erg gestink dat hulle die reuk nie kon verduur nie en ook bang was mense in ’n nabygeleë taverne sou dit ruik.
Hulle het haar in ’n plastieksak gesit en Tsediso is met haar weg.
Mojaki het getuig Segopolo, wat aanvanklik bereid was om uitwysings te doen, het die volgende dag geweier.
Hy was bang vir die gemeenskap.
In die erf waar Segopolo woon, het hy ’n stuk van ’n trui gekry en in ’n toilet en aan ’n deurkossyn van die huis het hy bloed gekry.
Mojaki het getuig die afdeling van die polisie waar hy werk, werk met moetie-moorde.
Hy is na Brandfort gestuur omdat vermoed is dat toordery betrokke kon wees.
Die gemeenskap van Brandfort was kwaad en wou die polisie aanval op soek na die meisie se aanvallers.
Adv. Pieter Nel, namens Segopolo, het aan Mojaki gestel dat Segopolo ontken dat hy só ’n weergawe van die gebeure aan hom vertel het.
Joseph Mosibili, wat saam met Segopolo as veiligheidswagte by die stadion, wat onder konstruksie was, gewerk het, het getuig Segopolo het die aand van 30 April laat by die werk opgedaag.
Sy wit hardloopskoene was bebloed.
Hy het gesê hy was in ’n geveg met ’n vriend en het die vriend met ’n bottel gesteek.
Mosibili het dié vriend die volgende dag gesien. Hy het niks makeer nie.
Adv. Amanda Bester het Maandag namens die staat dieselfde moordaanklag teen Godfrey Tsediso Makonyane (35) teruggetrek, omdat hy nie betrokke was nie. Die verhoor duur voort.
Volg Nuus24 op Twitter
- Volksblad
