Hof hoor hoe boer gekap, gesleep is
2010-04-21 10:10
Frans Coetzee, Volksblad
Kimberley – ’n Welgestelde kleinhoewe-boer van die omgewing is met ’n graaf teen die kop gekap, na ’n pakkamer gesleep waar ’n swaar ysterklip op sy kop gegooi is, voordat sy aanvaller goed in die opstal gesteel en gevlug het.
Só het ’n Zimbabwiese burger Dinsdag in die hooggeregshof die grusame dood van Elias Khari Sehularo (81) van die G. Sekai-kleinhoewe naby Roodepan in sy pleitverduideliking beskryf.
Die welbekende Sehularo, ’n wewenaar en vermoënde boer, het op 15 Mei verlede jaar aan veelvuldige skedelbreuke en breinbeserings op sy kleinhoewe beswyk.
Die vermoorde het ’n sny van 15 cm lank, wat tot in die breinweefsel gedring het, oor sy regterslaap gehad. Verdere veelvuldige skedelbreuke en breinbeserings is deur stompgeweld veroorsaak.
Luidens die nadoodse ondersoekverslag het Sehularo nog geleef toe die ysterklip teen sy kop gegooi is, want hy het bloed met asemteue in sy regterlong gesuig.
Gift David Muko-ndo (19) van Makopane in die Potgietersrus-distrik, het sedert 8 Mei na bewering met ’n vals werkpermit en onder ’n vals naam vir Sehularo gewerk.
Vier Roodepanse speurders, kapt. Nippie Hendricks, kapt. Dolf Louwrens, ao. Anthony Shuping en insp. Piet Hugo, het Mkukondo 18 dae ná die moord in ’n uitgebreide soektog in Limpopo aangekeer.
Die massiewe ysterklip, groter as ’n sokkerbal, is Maandag van ’n polisiebakkie gelaai en met ’n kruiwa na die hof gebring waar dit as bewysstuk ingedien sal word.
Waarnemende regter M.V. Pha-tshoane het ’n pleit van onskuldig op ’n aanklag van moord aangeteken.
Dit kom nadat adv. Theunis Barnard vir die staat ’n enkele sin in Mukondo se pleitverduideliking betwis het.
Barnard het gesê die staat aanvaar nie Muko-ndo se weergawe dat hy nie die opset gehad het om Sehularo dood te maak toe hy hom met die graaf gekap het nie, omdat hy glo slegs wou hê Sehularo moet weg van hom beweeg.
Luidens die pleitverduideliking wat adv. Lentswe Setouto namens Mukondo in die hof voorgelees het, is die beskuldigde van Masvingo, Zimbabwe.
’n Woordewisseling het op die dag van die moord tussen hom en Sehularo oor ’n gebreekte ruit ontstaan.
In ’n stadium het Mukondo ’n graaf in sy hand gehad waarmee hy die erf skoongemaak het. “Toe Sehularo nader kom, het ek hom met die graaf se onderkant (die skerp kant) teen die kop gekap. Ek het hom na ’n gebou langs die pakkamer gesleep. Ek het ’n klip op sy kop gegooi. Sehularo het nog geskop voordat ek hom met die klip gegooi het.”
Mukondo het erken hy het toe ’n selfoon met ’n simkaart, ’n trapfiets, ’n radio-DVD-speler en R1 000 in die luukse plaashuis gesteel. Hy het na Limpopo gevlug waar hy aangekeer is.
Mukondo het gesê hy is baie jammer oor wat hy aan Sehularo gedoen het. Hy het die vermoorde se familie om vergifnis gevra.
Die staat en die regter het Muko-ndo se pleitverduideliking in verband met die diefstalklag aanvaar.
Die verhoor duur voort.