Hof brand weer
2009-10-06 17:01
Herman Eloff
Pretoria- Amper 24 uur nadat daar ‘n brand by die landdroshof in Pretoria uitgebreek het, moes die gebou weer ontruim word.
Volgens Console Tleane, Tshwane metroraad-woordvoerder, het die brand omstreeks 15:30 op die vierde vloer in hof 1 uitgebreek.
“Ek kan bevestig dat daar weer ‘n brand was en dat die gebou ontruim moes word,” het Tleane gesê.
Niemand was tydens die voorval in die hof nie. “Almal is veilig en niemand is in die voorval beseer nie.”
Die brand was binne ‘n halfuur geblus.
Minstens 15 mense, waaronder gevangenes, is gister gehospitaliseer nadat 'n brand in die kelder van die hof uitgebreek het.
Die rede vir die brande is nog nie bekend nie.
Nuus24 het gister ook berig oor ‘n brand wat in die kelder van die Nedbank-gebou in Johannesburg ontstaan het. Daar was vroeër Dinsdagmiddag ook ‘n brand by ‘n hotel in Sandton.
–Nuus24