'Hoeveel die ANC-fees kos, is nie belangrik'
2011-11-28 09:00
Bloemfontein – Dit gaan nie oor hoeveel die eeufeesviering kos nie, dit gaan daaroor dat daar ’n suksesvolle eeufeesviering gaan wees.
Só het Gwede Mantashe, sekretaris-generaal van die ANC, Saterdag op ’n mediakonferensie op die Philip Sanders-oord buite Bloemfontein gesê.
Die ANC se nasionale uitvoerende komitee (NUK) het Sondag die laaste keer vanjaar vergader.
Volgende jaar se eeufeesviering, die welstand van die organisasie en sub-komitees was op die agenda.
“Hoeveel dit (die eeufeesviering) gaan kos, is die gevolg van die werk wat gedoen is. Hoe die geld ingesamel gaan word, het ook te doen met wie die organisasie ondersteun.
“Dit is nie die 100 jaar van die ANC nie, dit is 100 jaar van die struggle van ons mense teen kolonialisme en onderdrukking. En daarom moet ons mense feesvier.”
Volgens Mantashe gaan die eeufeesviering aanstaande jaar oor die jaar heen plaasvind.
Hy het gesê geen vaste bedrag kan nou al aan Januarie se feesviering in Mangaung gekoppel word nie, omdat dit nou eers in die opboufase is.
Vroeër is reeds bespiegel die eeufeesviering kan tot R400 miljoen kos.
Mantashe het ook gesê hulle is tevrede met die Rosestad se voorbereiding vir die eeufeesviering.
“Mangaung is reg. Ons het al die stadions, Waaihoek en al die ander plekke besoek en is tevrede.”
Volgens Mantashe gaan die stad in Januarie onder groot druk wees weens die groot aantal mense wat die eeufeesviering gaan bywoon.
“Mangaung is klein en die infrastruktuur is klein. As Mangaung skeur van al die mense is dit ’n positiewe probleem, want ons gaan niks as negatief beskou nie.”
Mantashe het gesê die ANC is ’n gesonde party wat groei en die eerste keer meer as ’n miljoen lede gaan hê.
NUK-lede was Saterdag in ’n ontspanne luim toe die media enkele minute toegelaat is om hulle te fotografeer. Trevor Manuel, beplanningsminister, het selfs ’n kortbroek gedra en Naledi Pandor, minister van wetenskap en tegnologie, het tekkies by haar romp gedra.
Sommige mense het selfs opgemerk die media het net kom kyk of Julius Malema ook daar is.
Die NUK het die eerste dag die eeufees bespreek. Pres. Jacob Zuma het ook ’n politieke oorsig gelewer.
Volg Nuus24 op Twitter
- Volksblad