Hoës in polisie hof toe oor Krejcir-klopjag
2011-04-02 21:29
Johannesburg - Die prokureurs van die Tsjeggiese bedrog-verdagte Radovan Krejcir het 'n skadevergoedingseis van R2 miljoen teen die minister van polisie, Nathi Mthethwa, en die nasionale polisiekommissaris, genl. Bheki Cele, ingedien ná 'n klopjag by Krejcir se huis in Bedfordview.
"Hierdie is namens Krejcir se seun, Dennis, 18, die Tsjeggiese besoeker Miloslav Potiska, Krejcir se werknemer Michael Arsiotis en Arsiotis se vriendin, Tracey Swanepoel," het Piet du Plessis aan die nuusagentskap Sapa gesê.
Die vier, wat by die huis was ten tye van die klopjag verlede Dinsdag, beweer hulle is ontvoer, aangerand en lastig geval deur die owerhede, wat na bewering opgetree het in opdrag van speurder Paul O'Sullivan.
"Toe die polisie die huis binnekom het hulle [na bewering] vir Dennis met kabels vasgemaak, hom weggeneem, gedreig, en toe later weer vrygelaat," het Du Plessis aan Sapa gesê.
Die ander is ook glo ontvoer en "op onwettige wyse hanteer", het hy gesê.
Swanepoel en Arsiotis beweer dat geen lasbrief aan hulle gewys is nie.
Krejcir se seun eis R1 miljoen se skadevergoeding, Arsiotis en Potiska eis elk R500 000, en Swanepoel eis R200 000.
Daar is tydens die klopjag beslag gelê op 'n sogenaamde moordlys met vier name daarop – dié van die staatsaanklaer Riegal du Toit, O'Sullivan, die onderwêreld-baas Cyril Beeka, en dr. Marian Tupy.
- Volg Nuus24 op Twitter.
- SAPA