Hoë se vrou in tronk oor dwelms; wat nou?
2010-02-01 10:42
Lizel Steenkamp
Kaapstad. – Die Hibuskus-munisipaliteit (Uvongo/Margate) is nie seker wat hulle te doen staan nadat Sheryl Cwele, eggenote van die minister van staatsveiligheid, op dwelmverwante aanklagte in hegtenis geneem is nie.
Die skandaal is ook ’n brandnetel vir die regering wat sedert Vrydag ’n doodse stilte handhaaf én dr. Siyabonga Cwele, immer te besig om kommentaar te lewer.
Mev. Cwele is direkteur van gesondheid en gemeenskapsdiens by die Hibuskus-munisipaliteit.
Sbu Mkhize, munisipale bestuurder, het aanvanklik by navraag volgehou daar is geen rede om mev. Cwele te skors nie omdat sy “net gearresteer” is. “Beteken dit sy is skuldig?”
Hy het later toegegee dat die plaaslike regering vandeesweek oor die kwessie sal beraadslaag.
Dr. Cwele het self nog nie ’n enkele woord gerep sedert sy vrou Vrydagmiddag in die Pietermaritzburgse hooggeregshof verskyn het nie.
’n Onbekende man het sy selfoon gister beantwoord en gesê die minister “is in ’n vergadering”. Hy het navrae na dr. Cwele se woordvoerder verwys, maar Cwele het nie ’n woordvoerder nie.
Thabile Mhlamvu, mediabeampte van die departement van staatsveiligheid, kon nie kommentaar lewer nie omdat haar selfoon stukkend is.
Cope eis dr. Cwele se bedanking en Theo Coetzee, DA-LP, gaan vra dat hy voor die parlement verskyn “sodat ons die versekering kan kry hy tree op in belang van Suid-Afrikaners en die Grondwet en nié dwelmsmouse nie”.
Volgens sr.supt. Musa Zondi, woordvoerder van die Valke, word mev. Cwele in polisieselle in Pietermaritzburg aangehou en sal sy Vrydag om borgtog aansoek doen.
Die polisie ondersoek sedert 2008 bewerings dat mev. Cwele en Frank Nabolis, ’n Nigeriër, by dwelmhandel betrokke is en jong wit vroue gewerf het om dwelms die land in te bring.
Intussen kon nie ’n enkele regeringswoordvoerder bereik word om kommentaar te lewer nie.
Ook pres. Jacob Zuma se woordvoerders het nie op boodskappe ge-reageer nie.
- Beeld