Hoë kry vyf jaar vir kleuter se dood

2010-03-12 08:34

Susan Cilliers, Die Burger

Johannesburg-’n Hoë ANC-amptenaar is Woensdag in die Newlands-landdroshof in Johannesburg tot vyf jaar tronkstraf gevonnis weens die dood van ’n vierjarige seuntjie.

Junior Belang is op 28 Oktober 2008 dood toe ’n opslagkoeël uit Uriel Abrahamse se geweer hom in Westdene in die maag getref het. Abrahamse is ’n bestuurder by Luthuli-huis, die ANC se hoofkwartier in Johannesburg.

Hy sal tien maande van sy vonnis in die gevangenis uitdien en die res in huisarres. Hy is nog nie in die tronk nie, want hy is op borgtog vrygelaat hangende sy appèl teen die vonnis.

“Ons is verlig hy is nou gevonnis,” het kapt. Richard Belang, ’n polisieman en Junior se pa, gister gesê.

Hy en sy vrou, Abigail, het “in die steek gelaat gevoel deur die staat” omdat Abrahamse nie aan moord skuldig bevind is nie. Abrahamse is aanvanklik van moord aangekla, maar het skuld op dié aanklag ontken.

Hy het wel skuld beken op ’n aanklag van strafbare manslag en is in Oktober verlede jaar daaraan skuldig bevind.

Abrahamse het op die dag van Junior se dood ’n man wat glo sy seun se selfoon gesteel het deur ’n parkie by die Sunbeam-crèche in Westdene gejaag, is vroeër getuig.

Hy het op die vermeende dief geskiet en ’n opslagkoeël het Junior getref. Hy is op die toneel dood.

Abrahamse het toe in ’n motor gespring en agter die man aangejaag. ’n Ooggetuie het Abrahamse agternagesit en hom vertel hy het ’n kind geskiet. Abrahamse het niks gesê nie en voortgegaan om die vermeende dief te jaag, het die hof gehoor.

Landdros Koos Pretorius het gesê Abrahamse het nie as ’n getuie beïndruk nie en homself telkemale weerspreek.

 Ishmael Mnisi, ANC-woordvoerder, het vroeër gesê die ANC kan nie kommentaar op Abrahamse se skuldigbevinding lewer nie omdat dit niks met die party te doen het nie.

- Die Burger