Hoe jonges met MIV ly
2010-06-03 08:46
Beeld
Johannesburg – Die aantal adolessente met MIV word al hoe meer soos kinders met dié virus oorleef omdat hulle toegang kry tot antiretrovirale medisyne (ARM) in Suider-Afrika.
MIV-positiewe jongmense kort egter gespesialiseerde sorg omdat hulle wroeg met erge sielkundige probleme en nie altyd hul medisyne korrek neem nie, het navorsers bevind.
Luidens ’n artikel in die jongste Bulletin of the World Health Organisation het ’n studie in Zimbabwe getoon 56% van MIV-positiewe adolessente het emosionele en sielkundige probleme.
Hulle het min selfvertroue, sukkel met verhoudings en is te bang om hul MIV-status bekend te maak.
Dr. Rashida Ferrand van die London School of Hygiene and Tropical Medicine in Brittanje en een van die outeurs, het gesê ’n hoofrede vir gepasmaakte dienste vir dié kinders is om hulle sover te kry om te hou by hul ARM-voorskrifte.
As ’n mens ARM ongereeld gebruik, kan dit veroorsaak dat die MI-virus in die liggaam weerstandig raak teen die medisyne.
Later word dit moeiliker om die virus met medisyne in toom te hou.
’n Risiko bestaan ook dat weerstandige virusse seksueel oorgedra kan word.
“Ons versuim om dié jonges se ontluikende seksualiteit en tipiese adolessente behoefte om te konformeer, in ag te neem, kan lei tot ’n hoër voorkoms van onveilige seks,” het Ferrand gesê.
In Zimbabwe was daar in 2007 sowat 120 000 kinders met MIV.
Die data van 115 MIV-klinieke in Zimbabwe het getoon daar word 24 958 kinders behandel.
56% van die adolessente het gesukkel met psigososiale probleme en 36% neem hul ARM ongereeld.
Een uit vyf adolessente het nie hul MIV-status in hul gemeenskap bekend gemaak nie.
Die adolessente sukkel om te identifiseer met hul MIV-negatiewe maats, voel angstig oor seksuele verhoudings en is bang vir die toekoms.
Volg Nuus24 op Twitter
- Beeld