Hoë ingeroep om Oscar se selfone te ontleed

2013-02-25 09:29

Pretoria – Die staat gaan 'n top-selfoon-ontleder van die Valke inroep om die inligting op die selfone wat by Oscar Pistorius se huis gevind is, te ontleed, berig Eyewitness News.

Dit het aan die lig gekom dat die selfone 'n belangrike rol gaan speel om die motief vir die skietery te bepaal. Pistorius word daarvan beskuldig dat hy sy vriendin, Reeva Steenkamp, op Valentynsdag in sy huis in die ooste van Pretoria doodgeskiet het.

Die Paralimpiese atleet is verlede week borgtog van R1 miljoen toegestaan.

Kapt. Francois Moller, ’n forensiese selfoon-ontleder, is die enigste van sy soort in die polisiediens en sy kundigheid is hoog in aanvraag.

Hy gebruik die selfoon sowel as inligting van die selfoondiensverskaffer om 'n tydlyn van gebeure te skep.

Die afgelope paar weke is daar wyd bespiegel oor 'n boodskap wat voor die skietery aan Steenkamp gestuur is. Verskeie nuusagentskappe het berig dat die Springbok-rugbyster Francois Hougaard, wat voorheen in 'n verhouding was met Steenkamp, kort voor die moord 'n boodskap aan die model gestuur het.

Moller se ondersoek sal waarskynlik die waarheid hieroor bepaal.

– Volg Nuus24 op Twitter