Hoë betaal R13 000 om motor te huur
2011-07-21 09:05
Kaapstad – ’n Adjunkminister het R13 000 betaal om ’n luukse voertuig vir ’n enkele dag te huur.
Dit is deel van meer as R200 000 wat die ministerie van openbare ondernemings die afgelope jaar betaal het vir die huur van motors.
Die DA het in reaksie opnuut daarop aangedring dat pres. Jacob Zuma die ministeriële handboek dringend moet wysig om verdere geldverkwisting deur sy kabinet te voorkom.
Malusi Gigaba, minister van openbare ondernemings, het dié inligting in ’n antwoord op ’n geskrewe parlementêre vraag deur JJ van der Linde, DA-LP, verskaf.
In een geval het Ben Martins, adjunkminister van openbare ondernemings, meer as R13 000 vir die huur van ’n VW Touareg vir ’n enkele dag betaal.
Van der Linde wou by die minister weet hoeveel sy ministerie die afgelope boekjaar aan die huur van motors bestee het. Die DA vra nou watter motorhuurmaatskappye gebruik is en waarom hulle gebruik is as hul pryse aansienlik hoër as die markverwante daaglikse koste is.
Die party het dié uitgawe Woensdag as onaanvaarbaar bestempel.
Dit bring die bedrag wat sewe ministeries die afgelope jaar aan die huur van motors bestee het op R1,5 miljoen te staan, het die DA gesê.
Luidens Gigaba se antwoorde het sy ministerie van 1 Maart 2010 tot op hede altesaam R201 904 aan die huur van motors bestee. Die inligting wat verskaf is, het ook betrekking op die vorige minister en adjunkminister van openbare ondernemings. Hul uitgawes aan gehuurde motors maak sowat R22 000 van die totale bedrag uit.
– Volg Nuus24 op Twitter
- Die Burger