Hillary Clinton op pad na SA

2012-07-29 18:13

Johannesburg – Hillary Clinton, die VSA se minister van buitelandse sake, sal Suid-Afrika in Augustus besoek, het die departement van internasionale betrekkinge Sondag gesê.

Clinton en Maite Nkoana-Mashabane, minister van internasionale betrekkinge en samewerking, sal op 7 Augustus samesprekings voer, het Clayson Monyela, woordvoerder, gesê.

"Die vergadering sal na verwagting [gebruik word om] verskeie sake van gemeenskaplike belang te bespreek," het hy in 'n verklaring gesê.

Monyela het gesê die verhouding tussen Suid-Afrika en die VSA is sterk, en dat die Amerikaanse administrasie daarin belangstel om op plaaslike en streeksvlak met Suid-Afrika saam te werk.

"Hoëvlak besoeke... deur adjunk-president Joe Biden aan Suid-Afrika in 2010 en die besoek deur adjunk-president Kgalema Motlanthe in 2011 aan die VSA, dui op die sterk verhouding tussen die twee lande, het hy gesê.

– Volg Nuus24 op Twitter.

- SAPA