Hier’s die SABC-verslag wat LP’s geheim wou hou
2010-08-24 08:02
Kaapstad. – Dr. Ben Ngubane (SABC-raadsvoorsitter) en Solly Mokoetle (SABC-groephoof) is die struikelblokke op die openbare uitsaaier se pad na geldelike stabiliteit en goeie korporatiewe bestuur.
Benewens Mokoetle se volgehoue minagting van die SAUK-raad, beteken Ngubane se buitengewone, ongewone en waaghalsige pligsversuim die raad kan nie sy statutêre en fidusiêre pligte nakom nie en die uitsaaier sal nie sy uitgawes aan die einde van die 2011-’12-boekjaar kan dek nie.
Dít is die strekking van ’n omvattende en vertroulike voorlegging wat die SAUK-raad vanoggend aan LP’s gaan doen.
Die voorlegging, wat tydens ’n geslote vergadering van die portefeuljekomitee oor kommunikasie gedoen sal word, is sonder Ngubane se bydraes deur die hele raad opgestel en onderskryf.
Die raad verklaar daarin ’n eskalasie van die voortslepende geldkrisis wat in die 2008-’09-boekjaar ’n hoogtepunt bereik het, staar die SABC in die gesig.
Hy sal ook vandag aan LP’s bevestig dat:
Die verhouding tussen die raad en die voorsitter “onherstelbaar verbrokkel het”;
’n Tugprosedure teen Mokoetle van stapel gestuur is; en
Die raad self verantwoordelikheid vir die opstel van ’n omvattende omkeerstrategie oorgeneem het.
Die voorlegging gee ’n breedvoerige oorsig van die raad se werksaamhede sedert hy in Januarie aangestel en Ngubane deur pres. Jacob Zuma as voorsitter aangestel is.
Dit het gevolg op meer as twee jaar se konflik, aantygings oor politieke inmenging en wanbestuur in die uitsaaier se uitvoerende bestuur en raad, wat uiteindelik tot reuse-verliese en ’n regeringslening van meer as R1,4 miljard gelei het.
Volgens die raad kon die heersende probleme by die SABC – waaronder geldmors, ongerymdhede met aankope en swak korporatiewe bestuur – weens Ngubane en Mokoetle se eensydige en soms onreëlmatige bestuurstyl nog nie opgelos word nie.
Ngubane word daarvan beskuldig dat hy raadsvergaderings summier en op kort kennisgewing kanselleer, dat hy inligting weerhou en raadslede verhoed om hul oorsigrol te vervul.
Die vernaamste klagte oor hom handel egter oor sy eensydige aanstelling – in oorleg met Mokoetle – van Phil Molefe as SAUK-nuushoof.
Die raad beweer dít is strydig met die SABC se oprigtingsakte en met ’n besluit van die raad gedoen.
Die raad beweer ook Ngubane “het op verskeie geleenthede aan raadslede gesê hy tree (met die aanstelling van die nuushoof) onder direkte instruksies van die president van die republiek op”.
Ismail Vadi (ANC), komiteevoorsitter, het gesê die vergadering word agter toe deure gehou sodat raadslede én Ngubane die vrymoedigheid sal hê om openlik oor hul griewe te praat.
Opposisiepartye het Vadi se versoek om ’n geslote vergadering ondersteun.
Juli Kilian (Cope) sê dis tyd dat ’n “ferm hand” die sukkelende SABC ophelp en dat besluit is om dit privaat te hou vanweë moontlike regstappe wat kan volg.
- Beeld