Herrie oor DA-vlag van trekker afgeruk is
2011-03-02 08:09
Koppies - Die munisipale bestuurder van die Ngwathe-munisipaliteit het glo ’n DA-vlag van ’n boer se trekker afgeruk toe dié gras op die dorp gesny het.
Carina Serfontein, DA-takvoorsitter op Koppies, sê dié boer het gras wat die munisipaliteit veronderstel is om kort te hou, gesny omdat die munisipaliteit “faal” om sy pligte, soos die basiese skoonmaak en opruiming van Koppies, uit te voer.
’n Groot DA-vlag is op die grassnyer, wat deur ’n trekker beheer word, aangebring.
Serfontein sê dié boer het die gras op versoek van die DA gesny.
Hy het self die trekker, grassnyer en diesel verskaf.
Die boer wil nie sy naam gepubliseer hê nie.
Serfontein sê Jonas Mosala, munisipale bestuurder, het beslag gelê op dié vlag.
“Hy het gesê hulle kan nie toelaat dat mense sien wie die gras sny nie en indien daar enigsins politieke identifikasie is, moet die werk onmiddellik gestaak word,” sê sy.
Steve Naale, munisipale woordvoerder, het nie pertinent bevestig of ontken dat Mosala die vlag afgepluk het nie.
“Die DA se bewerings is net om politieke punte vir die komende munisipale verkiesing te kry,” was sy amptelike kommentaar.
“Die munisipaliteit kan diens aan inwoners lewer, ongeag sy probleme.”
Dorpe in dié Ngwathe-munisipale gebied (onder meer Parys, Koppies en Heilbron) gaan swaar gebuk onder swak munisipale dienslewering.
Koppies ervaar gereeld water- en kragprobleme.
Diensleweringsprobleme het die afgelope maande reeds tot verskeie uitbarstings gelei.
Woedende inwoners van Kwakwa-tsi op Koppies het die munisipale kantoor aan die brand gesteek.
Op Heilbron het dae lange betogings teen gebrekkige dienslewering by tye in geweld ontaard, deurdat ANC-raadslede se huise beskadig en versterkte polisiespanne ingeroep is om betogers te kalmeer.
- Volksblad