Hernude spanning tussen regering en boere
2010-08-02 06:30
Somerset-Wes. – Hernude spanning dreig tussen die regering en kommersiële boere nadat Agri SA op die laaste dag uit die nasionale beraad vir kwesbare werkers geloop en hom aan verdere deelname onttrek het.
Geeneen van Agri SA se insette wat aan kommissies gelewer is, is glo in die resolusies vervat nie.
Johannes Möller, president van Agri SA, het net nadat die resolusies Saterdagoggend aan die beraad voorgelees is vir aanvaarding die verhoog betree en in ’n kort verklaring Agri SA se ongelukkigheid te kenne gegee.
Hy meen Agri SA het te goeder trou aan die beraad deelgeneem, maar dat die “wel oorwoë voorstelle wat op die provinsiale berade gemaak is, ook nie op die nasionale beraad ter tafel gelê is nie”.
“Dit is duidelik dat die uitkomste van die beraad belyn is met vooraf opgestelde politieke standpunte wat geensins verband hou met die werklikhede op plaasvlak nie.”
Möller het kort hierna die afvaardiging van 12 boere uit die markiestent by die Lord Charles-hotel gelei. “Die hand wat die boere uitgesteek het, is vir die soveelste keer weggeklap. Ons kan ook net soveel vat.”
Agri SA sal egter steeds voortgaan om buite die beraad met die regering daaroor te praat.
Sowat 1100 plaas-, vissery- en bosbouwerkers het die twee dae lange beraad bygewoon.
“Agri SA het die reg om so op te tree, maar enige optrede word gevolg deur ’n reaksie. Ek weet nie waar hulle ’n ander platform gaan vind nie, beslis nie in Suid-Afrika nie,” het Boitumelo Tshwene, LUR vir landbou, landelike ontwikkeling en omgewingsake in Noordwes wat direkteur van die program was, in sy reaksie gesê.
Die landbou-organisasie TLU SA het op die beraad gebly, hoewel hy bekommerd is oor vier sake wat in resolusies vervat is.
Jan Viljoen, voorsitter van die TLU SA in Limpopo, het gesê: “Ons wil graag ’n geleentheid hê om die dokument buite hierdie beraad met die minister
(van landbou, bosbou en visserye, Tina Joemat-Pettersson) te bespreek.”
Joemat-Pettersson, wat ná afloop van die drama eers opgedaag het, het TLU SA bedank dat sy vertoonwoordigers aangebly het en gesê dit is nie nodig om verskille buite die beraad op te los nie.
Sy het ’n trustfonds bekend gemaak om werkers wat afgedank word omdat hulle die beraad bygewoon het, met regstappe te help.
Dr. Pieter Mulder, leier van die Vryheidsfront+ en Joemat-Pettersson se adjunk, meen die kommersiële boere en plaaswerkers is op die beraad teenoor mekaar afgespeel.
“Dit kan op kort termyn politieke voordeel vir die ANC inhou, maar dit is vernietigend op lang termyn vir die ontwikkeling van die platteland en vir verhouding op plase.”
- Beeld